كتابات

صديق الشم يكتب الغَرض ..هَرج ومَرض!؟

صحيفة التحرير
مصدر الخبر / صحيفة التحرير

 

كُن مَعنا أو خَليك في الرصيف!؟ ..الثورة لاتقبل أنصاف الحلول ، وهي لا تحتاجك ،بقدر ما تريد انتشالك، ومازال اصحاب الأوداج (المنتفخة)..ومن يختبئون خلف (السبابة)!؟ يوجهون (شوكة الديك ) من وراء جدر الوسائط،غير قادرين على الجهر بها، يديرون الحرب بالوكالة.. مذبذبين لا إلى هؤلاء ..ولا إلى هؤلاء..وقودهم (غبن)..على أشخاص أو حسداً من عند أنفسهم ،أو بكاء على ترف قديم!؟..كيف إنسان بكامل قواه العقلية، يقيف قدام أهله وشعبه ووطنه والعالم !؟ديل قالوا ليك (انتهي الدرس ..) كفااااية ثلاثين سنه (عجاف )،والثورة تعدت ..اغتيال الشخصيات ..وعبث الصغار ،وانتظم المجتمع خلف حكومته ،في مبادرات مجتمعية وانسانية..(وطني البَمُوت وأخَلِي حَي )..مقدرين الجائحة التي يمر بها العالم،التي لا تفرق بين (قحكو)!؟ بدءوا بوزارة الخارجية ،رموا بكل أوساخهم، وخيباتهم ،فارتدت اليهم ..وعبدت الطريق بالصمت والنجاح،

ومنها إلى وزارة التجارة فرد عليها الوطن (الجوع ولا الكيزان)..الآن يصطادون في عكر (الكورونا)،
🩺وأكرم (أكرم) نفسه ووطنه ،بالصمت المبين..وقال سلاما!؟ عمل بس ..كما تناقلت الوسائط النجاحات ..
🩺وزارة الصحة ساااكته ..الجماااعة: والله الكورونا حاااايمه في السودان و المستشفيات مليانه بس كذابين و داسين مننا..
🩺وزارة الصحه: تم تأكيد وجود حالة كورورنا و الحاله المؤكده اتوفت رحمها الله..لدينا الان خمس حالات.
الجماعة: مااااافي كورونا و الحكومه عملت كده عشان تغطي على فشلها، و تجيب قروش من منظمة الصحه العالميه!؟..
🩺وزارة الصحه: لم تسجل إصابات جديده اليوم.
الجماعة: مستشفى أمبده فيها حالتين و رويال فيها و أم دفسو فيها 1ومستشفى المواني في بورتسودان ..الوزير بيكذب علينا.
🩺وزارة الصحة: قفلنا المدارس و الجامعات ،و منعنا التجمعات ، في المناسبات ، والسلام من بعيد لبعيد. .
الجماااعة: ده وقت مناااسب للمناسبات ودق (الظهر)!؟
وصلة الرحم .
🩺وزارة الصحه: الكمامات ليست للأصحاء.. غسلوا يدينكم و استعملوا المعقمات،
الجمااعة: الشي الوحيد العملو مشو اشترو الكمامات !؟و تجار الأزمات منهم رفع سعر الكمامات ،و المعقمات ، اعطس في الكوع من جوه..لو ما عندك منديل،
لحد ما مشكور الجزء الضميرو حي ،منهم بقى يحاول يتصدى للأزمه، بتصنيع المعقمات بسعر التكلفه (ديل بقى من رحم ربي) .
الحكومه ما قفلت المعابر..
الجمااعة : حكومتنا ما قفلت المعابر ،ده شنو الاستهتار و عدم المسؤوليه ده.
الحكومه قفلت المعابر.
الجمااعة: تقفل المعابر كيف !؟و السودانيين البره طيب.. ده شنو الإستهتار ده!؟
الحكومه فتحت المعابر ..للعالقين بره و عملت حجر صحي بعيد.
الجمااعة: تفتحوا المعابر ليييه !؟عايزين تقتلونا و الحجر الصحي ده بعيييد، و ما إنساني و لو في زول عيان أووووعى يقول حيودوا النقعه والمصورات،وبعدين السياحة حا تضرب!؟
🩺وزارة الصحه: نقلنا المحاجر لمستشفيات مهيئه جوه الخرطوم.
الجماااااااعة: تجيبو لينا المحاجر في محلنا عايزين تقتلونا.. حنولع لساتك ،لقو اللساتك محتكرينها ناس (قحت)..
الثورة ده ،،ثورة ..وعي مستمر تمارس النقد الذاتي،تجمعات تعبر عن رأيها،احتجاجات.. لتصحيح المسار ،مجموعة احزاب فَكة ..فكة وعاجباني !؟ايوه (فكة )بس أفْكَاره..

(صَم)..استقال ما استقال..ياهو (أيقونة )السودان!؟
الجماعة :في واحد شرد من الحجر الصحي وده الخطاب.. 🩺وزارة الصحة الخطاب مزور وقديم من زمنكم.
الجماعة :حمدوك حارساه الأمم المتحدة،عربات غريبة!؟انتهاك سيادة.
الحكومة: ده قوات سودانية خاصة بحماية سعادة رئيس مجلس الوزراء.
الجماعة:وزير المالية عين قريبته ..بت البدوي.

الوزير ..ما قريبتي وما بعرفه ،مجرد تطابق اسماء!؟ووووو !؟اتقوا الله في انفسكم وفي أوطانكم ..أيكون المؤمن كذاباً ؟..قال لا!
ركوب الرأس،، التنظير، ، التخوين،، الإستهتار، ، عدم المسؤوليه،، إستغلال الأزمات،، الجهل المتعمد و ضحالة الفكرة .. كله بجنبه والثور مااا شه،لا تنظر إلى ساقط في الطريق ،
🩺وزارة الصحه بتحاول تعمل كل الممكن ، وبعض المستحيل ،

يعني الآن التصنيع الحربي ،بدل يصنع أدوات واجهزة (الموت )والإبادة ..
يصنع اجهزة
🩺(الحياة) ..والتنفس الصناعي !؟
🩺وزارة الصحة بتعمل ده وغيروا وما عايزة شكر من زول ..ده واجبه ،عشان تسيطر على الوضع ،لأنها عارفه إنو مافي إمكانيات ،مافي بنى تحتيه، و مافي قروش ،و مافي دواء ..و دي حقيقة الوضع… لأول مره الحكومه هي البتتصرف صاح، والجمااعة..لا العجب ولا الصيام في رجب. يا اخوان ..تبينوا تحققوا ..شاور زميلك ..الحكاية كترت .. ماكويس على مصداقيتكم.

لسنا بحاجة الى المماحكة السياسية..في مرحلة (انتقالية ) تحتاج منا الكثير ،كلنا مسؤلون عن حمايتها ،وعلى الأحزاب ان تفصل بين تمثيلها في (قحت)، والعمل الحزبي ، الوطن يمر بضائقة كبيرة كما العالم،تطال الجميع وسيلطف الله بعبادة،وعلينا جميعاً ان ندعم ثورة، لكل أهل السودان،حيث انتفضت أطرافه، قبل حاضرته، لا عودة للوراء،

والوطن يحتاج الى علماء وساسة واقتصاديين ..قادرون على مجابهةمابعد (كورونا )بمعطيات جديدة لوطن جديد !؟
🩺🔬‼️حيو معي الجيش الابيض السوداني

صديق الشم

يمكنك ايضا قراءة الخبر في المصدر من صحيفة التحرير

عن مصدر الخبر

صحيفة التحرير

صحيفة التحرير

تعليقات

  • تحيه واحترام وتقدير للجيش الأبيض وكلنا نقف احتراما وتقديرا المجهود الذي يبذلوهو وعملهم وسهرهم تاج فوق راسنا
    نرجع ونقول للأخ الصحفي وكلام عن الكيزان ما عاجبهم العجب ولا الصيام في رجب
    نقول ليك حبيبي انا انتهى زمن الكيزان
    بس مشكلتك انت ومشكلة جدادد قحت انو اي زول بنتقد معناها كوز عملتو إرهاب للشباب الكانو بدعم ا الثوره منذ ٦ سنوات أمثال الانصرافي… اولاد الضي… ابو رهف وغيرهم
    بقيتو لا اسمع ولا أرى غير التطبيل اي انتقاد تكوزونو الناس
    بس بقول ليك كلمه بسيطه وصغيره
    منو الاستهون بوباء الكورونا وقال إنها صغيره
    منو الفتح المجال الجوي ولم بحجر القادمين لمده١٤ يوم
    ما تقول لي عشان الكيزان قالوا افتحوا المجال ولمن فتحناهو قلت ليه فتحتو بالله ده منطقك
    انت اعمل الصاح وشغلتك شن. بالكيزان
    بس مشكلتكم اي فشل عايزين ليكم شماعات ودي شماعه جديدة القال بتاع ده
    قالوا ليه عملتو الحجر في السليت ياخي مالك ومال ابو أهلهم اعمل الحجر في صحراء بيوضه وما تشتغل الا الصاح اليوم عايز تعمل شماعتك أنو الجداد ما عاجبو العجب
    انت اعمل العجب الصاح و….. في كل الجداد
    بس انتو ما عملتو الصاح فتحتو المعابر ولم تحجروا الناس لأنكم كنتو ما جاهزين حائمين بالبصات من ابو حمد لأرض المعسكرات لجبره وفي النهايه اتزكرت ا في مستشفى اسمو يونفرسال جبتوا الناس ٣ صباحا. خلي هم في الحوش ولم توفروازلبهم مويه ولا اكل ولا أطباء تخيل ناس جايبينهم للحجر من غير ماء ولا غذاء ولا اطباء
    وتجي تتكلم عن الناس الما عاجبهم العجب
    عجب شنو يا زول امشي طبل تطبيلك
    انتو اديتو الناس احساس بانو الحجر ده معناها الموت الجو ع العطش واسأل عضو السيادي عشه يا مسئولين ويا منظمات الحقونا بالمويه البارده بالله ده مستوى ده
    بس انت ما بتشوف لأنك ما عايز تشوف زي إعلام الكيزان أعمى واطرش لايرى الا ما ياهو الحزب
    وانت الان لاترى ولاتسمع الا ما ياهو قحت

  • فعلا السودان يحتاج في الوقت الحاضر محتاج لمفكرين وليس مخربين ينظرون فقط الي جيوبهم ولا يعرفون غير الكذب و التدليس و اللف و الدوران وكلوا معلوم مهما عاثوا بكل توجهاتهم الخربه نرصدهم و كتاباتهم لانهم لا يعيشون الا في المياه النتنه

    • وين المفكرين ياهم كفاءات الحريه ناس مدني
      السكر كان ب١٢٠٠ اليوم ب ٤ مليون
      باقة الزيت ٩ لتر كانت ب ١٧٠ج اليوم ب٧٠٠ج
      طبق البيض كان ب٧٠ج اليوم ب٢٧٠ج
      ياهم ديل المفكرين والمبدعين
      اجيك من الاخر عشان ما تكاككككك لي الكيزان كانوا فاشلين وبسبب فشلهم تم إسقاطهم لأنهم غلبتهم عديل كده أزمات وصفوف وقروش مافي َكلو كان حاصل
      بس اليوم الحال ياهو زاتو الحال بل أسوأ كمان
      كلكم فاشليننننننن
      انتو وهم فشله

  • اىصحفي عندما يكتب يكون متملك للمعلومة الصحيحة وليس لمجرد الكتابة ! الحالة في بورتسودان النتيجة سلبية .راجع الاخبار اولا ثم اكتب مقالك.