كتابات

الفاتح جبرا يكتب يااخ إتلهي !

كتب \ الفاتح جبرا
مصدر الخبر / كتب \ الفاتح جبرا

غني عن القول أن هذه الثورة الشعبية الظافرة حينما صادمت وضحت وإقتلعت ذلك النظام الظالم الباطش الفاسد من جذوره لم تكن تستهدف مجرد (إقتلاع) القوم ونظامهم البغيض ، بل كان ولا يزال هدفها تحقيق تغيير جذرى شامل في الأوضاع كافة ، والعمل على التمهيد من أجل إقامة نظام مدني ديمقراطي لكن بزج (النظام المقبور) للجنته الأمنية لتشارك في الحكومة الإنتقالية حدس ما حدس وتم إختطاف الثورة حيث أصبح الوصف اللائق بها الآن أنها (بدون ملامح) !
لقد إستغرش العبدلله كل الإستغراش وهو يطالع ما أفاد به الفريق أول صلاح عبد الخالق، عضو مجلس (الخيانة والغدر) لصحيفة المجهر السياسي في عددها بتأريخ ١٤/٣/٢٠٢٠ فسعادة الفريق (وهو عضو مجلس) يرى أن الأوضاع في السودان تتطلب تنحي الحكومة الحالية وإستبدالها بحكومة كفاءآت تقوم بالترتيب لانتخابات مبكرة (مضيفاً) بأن أن المؤسسة العسكرية لن ترضى بتسليم البشير للمحكمة الجنائية وأن (التسليم ده خط أحمر) ولم يكتف سعادتو بهذه التصريحات (المشاترة) التي لا يمتلك سلطة تنفيذها بل واصل (في رجالة مصطنعة) وفي غير موضعها قائلاً ( و لو ناس الحرية والتغيير دايرين يحاربوبنا يجونا عشان نوريهم الحرب كيف)؟
وهكذا يتبرع (الفريق صلاح) بإزاحة الستارعن الوجه القميئ للمكون العسكري لمجلس الخيانة والغدر ويفصح (عديل كده) عن أجندتة في إفشال الثورة وإجهاضها بل ومعاداته لهذا الشعب صانع الثورة التي كشفها قوله (نوريهم الحرب دي كيف؟)
ناسياً بل متناسياً الإنسحاب المزري لقواته من ساحة الإعتصام وتركها لجحافل الموت تغتال شباب هذه البلاد الأشاوس (فض الإعتصام أنتو كنتو وين يا صلاح؟)
وأين كانت قواتك المسلحة حينما إحتمى الشعب بساحتها فتركته (للكائنات الفضائية) تمارس القتل والسحل والإغتصاب ؟ أين كنتم جميعا يامن تمتلئ كتوفكم بالمقصات والصقور والنجوم (وكمان قال إنقلاب) حتى يحكموا هذا الشعب الذي لم يستطيعوا حمايته !
العبدلله (بالنسبة ليهو) فإن قواته المسلحة ماتت (وشبعت موت) ليس عند غيابها عن حماية أولادنا في مجزرة القيادة ولكن منذ أن خطب (حميدتي) خطبة (موثقة) أمام قواته في عام ٢٠١٤ يقول فيها:
( زي ما قلت ليكم البلد دي بَلْفها عندنا نحن أسياد الربط و الحل.. مافي ود مرة بفك لسانو فوقنا.. مش قاعدين في الضل و نحن فازعين الحرابة.. نقول اقبضوا الصادق يقبضوا الصادق فكوا الصادق يفكوا الصادق.. زول ما بكاتل ما عندو رأي.. أي واحد يعمل مجمجة أهي دي النقعة و دي الذخيرة توري وشها.. و يوم الحكومة تسوي ليها جيش، بعدين تكلمنا) !
كسرة :
قال شنو؟ ( و لو ناس الحرية والتغيير دايرين يحاربونا يجونا عشان نوريهم الحرب كيف؟ ) … ياااخ إتلهي ..!
كسرات ثابتة :
• أخبار الخمسة مليون دولار التي قال البشير أنه سلمها لعبدالحي شنووو؟
• أخبار القصاص من منفذي مجزرة القيادة شنووووو؟
• أخبار ملف هيثرو شنوووووو؟ (لن تتوقف الكسرة حتى نراهم خلف القضبان)
• أخبار محاكمة قتلة الشهيد الأستاذ أحمد الخير شنوووووو؟ (لن تتوقف الكسرة إلا بعد التنفيذ)
الجريدة
_

عن مصدر الخبر

كتب \ الفاتح جبرا

كتب \ الفاتح جبرا

تعليقات

  • ما قلت الا الحق جبره ولكن امثال الرجل وهو اسد علي الشعب و في الحروب نعمه يطلق كلامه الفاسد كجماعته الفاسده التي تربت علي السحت و اكل مال الشعب بالباطل و اكتشفنا انهم لا ياكلون الا من ايادي اسيادهم الكيزات لذلك يتباكون علي الماضي الذي ولي وراح و يزرفون الدموع علي عودتهم لقد طويت صفحتهم الفسده ولا وجود لهم مره اخري

  • وهوّ يعنى يا دكتور بعد كوول اللى كتبتو انت دا واللى عَمّال غيرك بيكتبو فيه عن اللى حصل واللى بيجصل على مرأى ومشهد منكم..ونتو قابلين له راضين به لنسألنّك “هل لسّ ما اصبحتوش “خُرفان”.. يعنى فقط لسّ فى مرحلة ما قبل “الخرفنه”! فاضلّكم كم حتظلوا وما تمفكّون وتزالون تعيشون زيهم تنومون وتصحون على فرقعة “الصسيطان” منتظرين “الدبح”.! لكن بس لامتين حالكم دا حيظل كدا منصوب او واقف! منتظرين منووو؟ يغيرهولكم! الله لا يغيّر ما بقوم حتى يغيّروا ما فيهم!

  • الله يكون في عونك يالفاتح بس إكتشافك دة متأخر جدا وكمان كلكم شاركتم في جريمة قتل الوطن وصاحبنا العسكري ده ليه حق لأنو عارف ناس قحت وعارف إنو مريض أفريقيا لن يشفى ولو حكمته الملائكة ياجماعة خلونا نموت وبس

  • ما قلتو حريه بتحجبوا تعليقات ليه عشان فيها رد لزولكم المخرف ده
    هو لو عندو صدق يكتب لينا في قحت
    واخفاقاته
    وفشله
    لا جازولين ولا خبز وغلاء
    وادخل ا كورونا بفشلهم فتح المجال الجوي يوم ٢١ مارس

    • عايزين نعرف أخبار لجنة التحقيق في أنبوب النفط
      ومدني الوعد بحل مشكلة الخبز في ٣ اسابيع
      دي يا فاروق ما محتاجه منك تكتب فيها
      ولجان……
      و١٨٦كيلو ذهب الفصل ا فيها وزير والمناضل

  • والله واضح إنو في مجهود جداد إلكتروني منسق ومتذاكي على كل الأسافير، بس السؤال تبع منو؟ كيزان وللا مجلس عسكري؟ وللا الاتنين واحد؟

  • ياجماعة في زول انتبه انو من يوم العبور العظيم في ٦ ابريل ٢٠١٩م ولغاية مجزرة فض الاعتصام الغادرة في يوم ٣ يونيو ٢٠١٩م حدثت امام القيادة خمسة مجازر .. مجزرتين كانو في عهد المخلوع وكتائب ظله وثلاثة مجازر في عهد المجلس العسكري الانقلابي (مجزرتين في رمضان والمجزرة الكبري في يوم ٣ يونيو المشوؤم)
    والله الشعب السودانى دا عانى من الكيزان اشد المعاناة واذاقوه الويل والعذاب لدرجة لاتوصف ولو كان شعب تانى كان كل مجموعة هجمت ليها علي كوز ابن حرام وقتلته في مكانه
    ملحوظة: في الجزائر ولبنان العلمانيتين لم يصب مواطن واحد بجرح او خدش لكن في ظل ماسمي (دولة الشريعة الاسلامية) حصلت خمسة مجازر امام قيادة الجيش الوطنى وراح مئات الانفس ضحايا للقتل المباشر المتعمد وللاغتصاب وللرمى في النيل وللاعتقال وتعذيب المعتقلين حتى يفقدوا عقولهم وكل ذلك باوامر عليا من (الاسلاميين) والنظام الاسلامي
    تبا للارهابيين المتغطين بالاسلام

  • قول الحق ياعبد الله او ظاصمت ماضيع لينا وقتنا الجكومة الحالية لم تحدد اي شي من اهداف الثورة

  • ي أخي جبرة والله ليهو الحق يقول كده لو كانت حكومة قحت قوية ومتوحدين لتم القبض عليه فوراً وإيداعه في السجن وليس هو فقط نرى كثير من الكيزان امثال الصعيدي غندور وحسين خوجلي واسحاق يؤججون الفتن بدون حسيب او رقيب وحسبنا الله ونعم الوكيل في هذه الحكومة التي لاتساوي قطرة واحدة من دماء شهداءنا الأبرار !!

  • ويفصح (عديل كده) عن أجندتة في إفشال الثورة وإجهاضها بل ومعاداته لهذا الشعب صانع الثورة التي كشفها قوله (نوريهم الحرب دي كيف؟)… قال الكلام ده لقوي الحرية والتغيير وليس للشعب … وهو في ذلك صادق… لان كل الشعب الآن ضد قحط التي فشلت في كل شي وبقيتوا ملطشة للجاي والماشي… الا الهم المتحزبين وأصحاب الاجندات ذيك.. فاللهم أذل الشيوعيين والعلمانيين والجمهوريين والملحدين ومن والاهم… اكتر من كده

      • بالمناسبة التوضيح ده موجه للكيزان (زنا رمضان) ده ما المقصود به جريمة فض القيادة العامة فقط في رمضان هذه عادة قديمة تجلت بوضوح في حادثة قبض (البلدوزر) متلبساً مع 4 حسناوات في نهار العشر الأواخر من رمضان وقع ليلك ماذا يدعى الكوز (بذاني رمضان)!!؟ والآن كما ظهرت جرائم حرق (القمح) قوت الشعب مثل حرق النخيل وفوق ذلك التلفظ بالفاظ نابئة من على منبر رسول الله وحض المواطنين على عدم سمع توجيهات الدولة أيه رأيك ؟؟

  • لو احسن ناس قحت إدارة الدولة ما كان سمعنا مثل هذه الاقوال ولكن فشل ناسك خلى زي ديل يظهروا وكمان يعلنوها على الملأ وحتى أقوالك واقوال صحفي الثورة والتي تقلل من شأن الجيش تجعل جملة منهم يأخذوا موقف سلبي منهم وبالتالي انتم لا تلقوا اللوم عليه فقط نحن بكل تأكيد لا ندعوا للقول الدراب ولكن شدة الحملة تجاه الجيش تجعل بعضهم يخرج من صمته ويبوح بما لا يستحسن والفترة الحالية هي مسؤولية الجميع نحن تحررنا من حكم الفرد وفشل هذه الفترة يعني اما فوضى واحتراب داخلي او فرصة فعلا لمراهق يمكن ان يدخلنا في نفق جديد

  • يا اخي والله اتلهب انت وانثالك حارقي البخور…
    والله اذا في حد اختطف الثورة والله اختطفها امثالكم ذوي النفوس المزؤومة… التي لها اغراض شخصية…

    بالمناسبة اخبار * هيثرو شنو؟؟؟
    اخبار ال٦٤ مليار دولار شنو؟؟؟
    اخبار ممتلكات واصول الجماعة شنو؟؟
    اخبار جبل عامر وشركة الموارد شنو؟؟؟
    اخبار الدولار والكرونا شنو؟؟

    بالله اتلهي انت … وارحموووونننناااا
    يا *العبد لله* يا لاهي!!!

    • شركة الموارد المعدنية جابت ليها فصل مدير واردول
      ما عارفين الحاصل سنو
      الوزير كان بتكلم عن ١٨٦ كيلو ذهب
      بعدها حصلت استغناء عن المدير
      وتحويل اردول لمستشار