كتابات

الفاتح جبرا يكتب : الأسد ذاااتوو !

الراكوبة نيوز
مصدر الخبر / الراكوبة نيوز

تقول الطرفة أنه قد تم تنظيم إحدى مسابقات العدو (للقطط) بالولايات المتحدة الأمريكية وقد تفاجأ الجمهور بأن القط السوداني (أب زرد) قد إكتسح كل (كدايس الدنيا) المشاركة في وقت قياسي مما أذهل الحضور وجعل القنوات الفضائية تتسابق لتهنئة صاحبه بالفوز الكاسح المؤزر متسائلين عن سر هذا الفوز في بلد (تعبان) أنهكه (الكيزان) إلا أنه كما يقولون (إذا عرف السبب بطل العجب) فقد كانت إجابة صاحبه :
• والله يا جماعة (أب زرد) ده أصلو كان في الحقيقة (نمر) لكن الظروف !
وعطفاً على هذه الطرفة نتناول في هذه الزاوية ما رشح من صور على منصات التواصل الإجتماعي لعدد من الأسود التي تم حبسها بحدائق القرشي بالخرطوم لتكون مصدر ترفيه للزوار فاذا بها تنقلب إلى (مصدر رثاء) و إنسانية، أقصد حيوانية اثر تجويعها وعدم تقديم الطعام لها منذ أشهر مما إنعكس على حالتها الصحية فصارت في حجم (أب زرد).!
لقد شاهد العبدلله بالأمس مقاطع فيديو لمواجهة تمت بين المستثمر المسؤول عن الحديقة وبين مسؤول الحياة البرية من أجل تنوير الرأي العام وتحديد عمن تقع مسؤولية إطعام هذه الأسود (المسكينة) ذات الحظ العاثر والعناية بها ؟ ورغم أن هذه الجزئية من المفترض أن تكون واضحة وضوح الشمس في العقد المبرم بين الجهتين إلا أن الطرفين قد قاما بالتنصل عنها وكل واحد قعد (يدرعا) في التاني وإنتهت المقابلة دون الوصول إلى الحقيقة ولا عزاء للأسود !
هذه الحادثة تبين بوضوح أن الأمور في عهد النظام المباد قد كانت تسير بالبركة وتفتقد إلى المهنية والشفافية والمحاسبة وتحديد المسؤولية وبعد أن قامت الإنقاذ بتجويع الشعب السوداني الفضل ها هي كما نرى تقوم بتجويع (الأسد ذاتو) وتجعل منه (شبحا) كسيحاً يعاني الضعف والهزال مستلقياً على الأرض كمن يعاني شللاً رباعياً!
إن هذه الحادثة البشعة من شأنها أن تفتح ملفاً مسكوت عنه توالت عليه السنون وهو ملف بيع أرض وحيوان (جنينة الحيوان) كما كانت تسمى حيث يظل السؤال قائماً وهو لماذا تمت إزالة حديقة الحيوان القديمة (من أساسو) ليتم تشييد ما يعرف ببرج الفاتح على أنقاضها؟ تلك الحديقة الجميلة بكل ما تعني هذه الكلمة بأشجارها وطيورها وظلالها وحيواناتها؟، تلك الحديقة التي إرتبطت بوجدان شباب وأطفال وحتى كهول ذلك الزمان البديع؟
ولعل السؤال الأكثر إلحاحاً هو: ولماذا بالتحديد كان الإصرار على (الحتة دي بالذات)؟ فقد كانت هنالك أماكن عديدة يمكن إنشاء هذا (البرج) دون أن نفقد هذا الجزء العزيز لدى غالبية المواطنين (إلا زولنا داك)..!
أما السؤال الذي يبعث على الإستغراش الفعلي فهو أين ذهبت حيوانات تلك الحديقة ؟ أذا علمنا أنها كانت تحتوي تقريباً على معظم الحيوانات والطيور والزواحف؟ والبرمائيات ؟ الناس ديل ودوها وين؟ (يعمينا ويطرشنا) ما شفنا لينا إعلان مزاد في الصحف لبيع أفيال وتماسيح وأسود..!
كسرة :
تاكلو لحم الشعب عرفناها .. كمان تاكلو لحم الأسد ذااااتو؟ !
كسرات ثابتة :
•أخبار الخمسة مليون دولار التي قال البشير أنه سلمها لعبدالحي شنووو؟
•أخبار القصاص من منفذي مجزرة القيادة شنو(و)؟
• أخبار ملف هيثرو شنووووو؟ (لن تتوقف الكسرة حتى نراهم خلف القضبان).
•أخبار محاكمة قتلة الشهيد الأستاذ أحمد الخير شنوووو؟ (لن تتوقف الكسرة إلا بعد التنفيذ).
الجريدة

اقرا الخبر ايضا من المصدر من هنا عبر صحيفة الراكوبة نيوز

عن مصدر الخبر

الراكوبة نيوز

الراكوبة نيوز

تعليقات

  • لو عثرت بغلة بالشام إني مسؤول عنها يوم القيامة .. حتى الأسود امكن ترفض عودة النظام البائد … رغم على حد قولهم أن نظامهم إسلامي … هل الإسلام حض على الرفق بالحيوان … عذبت إمرأة في هرة …. لن يكون السودان مترع للنفاق والجهل مرة أخرى … ونسأل الله ان يغفر لنا من حق هذه الأسود … لو علمنا بها لاطعمناها من قوت أطفالنا

  • عين الكيزان بقت قويه وفي الخيال احلام العوده الميمونه للحكم والشغل بتاعكم نضج حصار وازمات وشغل نظيف ما فيهو هزار .ما بنستقرب خروج مواكب الاعتذار للكيزان.يا جماعه اصبروا شويه ورقوا المنقه خلوا الناس تنسي عمايلكم عشان تقدر تستحملكم من جديد وخففوا شويه علي المناضل الفاتح جبره نحنا عارفنو كان قاسي عليكم بس هو راجل قلبه ابيض والي في قلبه علي لسانه. فكوا الحكايه شويه علي الشعب ما ممكن تزردوها شديد كده حرام عليكم ده الشعب برضه اكل معاكم فتات عيش وملح، ما عليكم ما تزعلوا من قحت ما كان قصدهم بس الثوار دفعوهم يبلوكم وما تنسوا يا حبايبنا الثوار ما زالوا مصرين يبلوكم وقالو الايد الخانقاهم بيلووها الي ان تنكسر بس اصبروا ثاني ثلاثه شهور ثوار السلاح داخلين الساحه وامانه ما تشوفوا بل ما شفتوهو في اسؤا كوابيس نومكم … لوكوا الصبر.

  • خرج من الموضوع بعذ ر اقبح من ليتك سكت كان احسن بدون ما تحاول التغطية الفسل الحاصل امامك في كل انجازات القحاتة لو عندهم انجاز ووجدو ضالتهم في امثالك.

  • ي جبره امشى الكنتين سريع جيب علبتين بف باف لانو فى ضبان كتير فى التعليقات التحت دى

    • والله ضبان غيرك انت مافي لا تقبلوا النقد واي منتقد كوز ومندس ياخي بطلوا اوهامكم
      عايزين الناس البتطبل بس
      اي منتقد تطلعوا زيتو… وين الحريه
      تنط تقول لي وين الحريه زمن الكيزان
      ارد ليك اقول ليك ما كان في حريه اه يعني انتو رجعتونا لزمن الكيزان تاني

  • الدولار ابو 105 ماسمعت بيهو ولا ماحكو ليك بيهو ام انت اصحبت من صحفي الحكام وجماعة البلاط ومشروع الجزيرة الماقدروا اهله يزرعوا قمحهم اطرشك كمان والناس الخرجت من الجوع ديل كمان مالقوك في الشارع اخشى المرة الجايو يجوك عديل في البيت اشوفك بتركز ليهم وصفقة فاخر الدهب كمان بشوفك عامل منها نايم ممكن ليك فيها نصيب والغلاء واعدام الخبز ايضا انت ليس من اصحابه ام ان خبزك بجيك عديل لحدي بيتك وما بتقيف في صف الحال المايلة ما درسوك ليها وازمة المواصلات سيبك من القديم خليك مع الجديد

  • وقحت دي استلمت الحكم ليها ٨ شهور
    في كل الزمن ده ما اكلتوها لي
    الشماعه بتاعتك…. انت يا فاروق جبره ٨ شهور لم تنتقد قحت هل هم ملائكة من السماء لا أخطاء لديهم ياخي انتقد من أجل الإصلاح
    اصلا ما شفت الناس واقفه للمواصلات
    ما سمعت بزول بطلع من الشغل ٤ يصل البيت ٨ مساء
    ما عارف اسعار المواد الغذائية ومعايش الناس شنو الحصل فيها ايام القحت بتاع الحريه
    ما شاهدت صفوف الخبز
    وطبق البيض ابو٢٢٠ج ورطل اللبن ابو ٣٠ج والسكر ابو ٥٠ج للكيلو
    انت شكلك عايش في نعيم ورفاء وشكلك خارج السودان
    اسود شنو الناس جاعت يا فاروق جبره وزمن قحت جابت لينا القحت وهموم ومعايش الناس آخر همومكم شغالين سياسه وتتفشوا في غبينتكم وشكلو ال٣٠ سنه دي معشعشه في رأسك وما شايف غيرها
    بس مازلنا نحن نعاني…. تذوقنا الامرين
    مر الكيزان ومر قحت القحت
    لاخير فيهم ولا خير فيكم

  • والله بالغت.. يا جبرا.. يا مسييييييخ
    معقولة…الأسد ذاته علقتو في شماعة الكيزان والدولة ،*المسيخة*
    يا اخي كفاية وشوف لينا
    نتائج *كسراتك اللى كسرت بيها رؤوسنا وفقعت بيها مباراتنا..
    *هيثرو* حلايب*شلاتين*
    وأخير دايرين نعرف مين *فض الاعتصام* ؟؟
    واخبار قفة ملاح الغلابة..